【經濟越差，唇膏越好賣？】
想知道一個地方經濟是好是壞，我哋普遍會參考失業率、通脹率、罪案率、樓價等等數字。話你知，原來唇膏銷量，都反映到經濟狀況，而且有機會成反比！
當經濟陷入困境，消費能力理應會減弱，但係有人發現奇怪現象，唇膏銷量竟然會不跌反升。呢個「唇膏效應」就係由Estee Lauder前CEO Leonard Lauder提出。「唇膏效應」解說係，經濟不景氣時，大家都傾向留返多個錢，放棄購買車、樓、珠寶等奢侈品，而女士們唯有退而求其次，改為買價錢平啲嘅產品好似唇膏，平之餘又滿足到購物意慾！無論係上世紀30年代美國經濟大蕭條，定抑或近期少少，2008年金融海嘯、2001年互聯網泡沫爆破、911恐怖襲擊事件，市場上都一樣出現「唇膏效應」。
不過，如果將「唇膏效應」放喺今次全球經濟衰退就未必發生喇！因為疫情影響下，大家都已經減少出街見人，就算真係出街，乖乖地載住口罩，又邊有人欣賞到烈焰紅唇呢？其實近年亦有另一個效應成為奇怪經濟指標，就係「指甲油效應」。經濟好嘅時候，女士們都幫襯美容院嘅美甲服務；但經濟差嘅時候，女士們為咗繼續扮靚，改為喺屋企自己DIY搞掂，指甲油銷量自然節節上升喇！
Search